Poemas para peques

A escola

2011-10-21T21:17:00.000+02:00

A pombiña branca
quería ir á escola.
Mercou catro libros
un lapis e goma.
Gloria Sánchez

A cidade onde vivo

2011-03-19T23:54:00.004+01:00

A cidade onde vivo ten mar.
No inverno é mar bravío;
no verán, agarimoso;
cando quere mimoso e cando non,
maldito,
perigoso,
traidor,
e, se non,
que llo digan ó pescador
que nel anda, coma unha espiña
para traer a porto
pescada e xurelo e sardiña.

Fran Alonso. "Cidades". Xerais
Imaxe:"Berbés". Lugrís

Un home de Lugo criaba perdices

2011-03-19T23:07:00.003+01:00

Un home de Lugo criaba perdices
pra que os namorados se amasen felices.

Criaba perdices con trigo e arroz
pra que os namorados se enchesen de amor.

Con trigo e arroz e verzas ben grandes
pra que os namorados de amor se fartasen.

Con verzas ben grandes e pedras de azucre
pra que os namorados se amasen nas nubes.

Con pedras de azucre e gromos de lirios
pra que os namorados sentisen delirios.

Con gromos de lirios criaba perdices
pra que os namorados de amor se fundisen.

E tantas perdices criou o bon home
que para si mesmo non buscou amores,

e cría que cría, perdendo a memoria
nun pau dun poleiro quedouse sen noiva.

Antón Cortizas."Era unha vez na quimbamba". Tambre

Carnaval

2011-02-24T00:00:00.001+01:00

Carnaval na praza:
danzas,
carracas
....
(Carla a vaca,
Sandra a marrá) ...
Carnaval na praza:
capas,
máscaras .
.....
(Alba a dama,
Lara a rá)
...
Carnaval na praza:
samba,
palmas
...
(Sara a gata,
Marta, paspallás)
...
Carnaval na praza:
a mala cara
gardada na casa. Elvira Rivero Tobío. "Palabras brancas". Ed. Xerais 2008
Imaxe: Fino Lorenzo. "Palabras Brancas". Ed. Xerais 2008

Bagdag

2011-02-23T23:13:00.003+01:00

A paz abafa calada
nas casas
da gran Bagdag.

Bagdag agarda
mañás calmas
bañadas en paz.
A paz calza alpargatas,
balas calza
a arma fatal.

Bagdag arrastra
palabras mancadas
tras as armas vas.

A paz,
palabra tan cara,
a paz, palabra cabal.

Bagdag agarda
a paz da nácara,
prata, ámbar, ananás
..

A PAZ
Elvira Rivero Tobío."Palabras Brancas". Ed. Xerais 2008.
Ilustración Fino Lorenzo

Basta

2011-02-23T22:26:00.006+01:00

Basta á paz maltratada,
ás trampas canallas,
ás malvadas lacras: basta!

Basta á fatal labazada,
ás casas arrasadas,
ás falsas fazañas:
basta!

Basta ás mans asañadas,
ás fadas malfadadas,
as malas malandanzas:
basta!

Basta ás amargas palabras .
Grazas ás palabras plantadas
nas landas da paz.

Elvira Riveiro Tobío. "Palabras Brancas". Ed. Xerais 2008
Imaxe: Fino Lorenzo

Basta

Un soldado detrás dun fusil

2011-01-23T22:35:00.002+01:00

UN SOLDADO DETRASDUN FUSIL

Unsoldado detrasdunfusil detrasdunhabala detrasdoutrabala detrasdoutrabala detrasdou
…..é
unha enorme
parvada.

Gloria Sánchez.

Canta a fontiña

2010-05-09T22:16:00.005+02:00

CANTA a fontiña
canta a fontela
i anque a canción é dela
ten unha cousiña miña
pola que podo entendela.

Os Eidos.Uxío Novoneyra.Edicións Xerais.

Imaxe : www.culturagalega.org/roteiros/detalleextra.p...

Pacen as vacas

2010-05-09T21:43:00.003+02:00

Pacen as vacas

na navarega.

Treme a pequeña

que vai co`elas.

Febreiro chove

febreiro xea

febreiro neva

neve lixeira.
Os Eidos.Uxío Novoneyra. Edicións Xerais.

Imaxe : alema.org/category/portugal/page/3/

Cai a neve,cai,cai

2010-05-09T21:31:00.005+02:00

CAI a neve cai cai
Falopiña a falopiña
nin o vento a arremuiña
nin a auga a desfai
…………………………………
Cidro Castro de Brío nevados!
Baixa a neve hastr´os prados.
Os Eidos. Uxío Novoneyra. Edicións xerais de Galicia.
Foto: Seara - Moncho http://www.panoramio.com/photo/6028868]

A biblioteca escolar

2010-05-06T21:48:00.004+02:00

A BIBLIOTECA DA ESCOLA
Por si alguén o dubida
na biblioteca escolar
poden facerse amigos
tan só con abrir ó azar
as follas de calquera libro:
un pirata, unha illa, o mar,
un cofre misterioso
que axiña hai que enterrar,
unha princesa enfeitizada
por unha bruxa malvada,
un ogro cruel que encrespa a pel
ou unha toupa que atopa un anel
máxico que a volve invisible.
Nos libros, que o saibades, todo é posible.

"Martingadas" publicado por Morgante, un selo de Rinoceronte Editorial é deSantiago Freire

Poema de outono

2010-04-10T10:36:00.003+02:00

Este poema de outono é un traballo da clase de segundo:

Verde...

a folla da primavera verde,

a come o verme.

Vermella...

a folla vermella,

fai a súa cama a ovella.

Amarela...

a folla amarela,

a nena xoga con ela.

Marrón...

a folla de outono marrón

é da cor do turrón.

Chove moito, chove moito.

Choven follas, choven castañas,

choven cabazas, paraugas.

Chove moito, chove moito.

Choven gatos, choven cans,

choven árbores e bastóns de gominola.

Chove moito, chove moito.

Choven churros con chocolate quente,

choven pelotas,

choven orellas de galleta e ollos que te miran.

Chove moito, chove moito.

Choven asubíos

e choven historias e contos viaxeiros,

choven nenos e nenas.

Chove moito, chove moito.

o sol

2009-10-29T23:30:00.002+01:00

ADIVIÑA

REDONDO COMA UN PRATO
E TODAS AS MAÑÁS
SAE AO MERCADO.

Paco Martín."¿que cousa é cousa...?Ed.Galaxia

Joan Miró"Sol Vermello".

A LÚA

2009-07-23T23:27:00.000+02:00

A SEÑORA LÚA
INDA ESTÁ SOLTEIRA

¡A SEÑORA LÚA,
A LÚA LUEIRA!

A LÚA LUEIRA,
A SEÑORA LÚA:
¡TEN GANA DE TROULA
E QUERE IR DE RÚA!

¡E QUERE IR DE RUA,
DE TROULA IR QUERÍA.
QUE SENTE MORRIÑA
E MELANCOLÍA!

A SEÑORA LÚA,
A LÚA RUEIRA,
COMO ANDA DE NOITE,
SEMPRE ESTÁ TRISTEIRA.

SEMPRE CON TRISTURA
E MELANCOLÍA
QUE ANDA POLA NOITE
E DORME DE DÍA.

Manuel María. "Os soños na gaiola".Merlín Xerais.

NASÍN CANDO AS PRANTAS NASEN

2009-05-14T23:36:00.003+02:00

Nasín cando as prantas nasen,
no mes das froles nasín,
nuha alborada mainiña,
nunha alborada de abril.
Por eso me chaman Rosa,
mais a do triste sorrir,
con espiñas para todos,
sin ningunha para ti.
Des que te quixen, ingrato,
todo acabou para min,
que eras para min todo,
miña groria ,meu vivir.
........................................
........................................
O meu corazón che mando
cunha chave para o abrir,
nin eu teño máis que darche,
nin ti máis que me pedir.
"CANTARES GALLEGOS"

ROSALÍA DE CASTRO."Escolma poética".ED Factoría K de libros.

O REI TIÑA UNHA FILLA

2009-03-15T18:29:00.005+01:00

O rei tiña unha filla
que morría de amor,
e por vela curada,
sen máis declaración,
ó Amor,queiras non queiras,
do reino desterrou.

O Amor, moi xuicioso,
obedecendo a lei,
camiño do desterro
foise co que era seu:
cos bicos e coas rosas...
¡e coa filla do rei!

RAMÓN CABANILLAS"A rosa das cen follas"
Recollido de "Poetízate",de Fran Alonso

POR AMOR

2009-03-15T18:16:00.005+01:00

Por amor nacín da terra.
Por amor son o que son.
Por amor canto o meu canto,
por amor.

Por amor sángranme os pulsos
e abréseme o corazón.
Por amos dóenme os ollos.
Por amor,só por amor.

DARÍO XOHÁN CABANA."Cantigas do setenta.A sede,a auga"
Recolllido en "Poetízate",de Fran Alonso.Ed Xerais
Imaxe "El beso" de Gustav Klimt

OUTRA ADIVIÑA

2008-11-10T01:21:00.002+01:00

ALTO POMPÍN
REDONDO MOLETE,
QUE CHOVA,
QUE NEVE,
E NON SE DERRETE.

Paco Martín ."Que cousa é cousa...?".Ed.Galaxia.

ADIVIÑA

2008-11-10T01:16:00.003+01:00

SEN TRABALLAR TEÑO CUARTOS
SEN MORRER SON NOVA OU VELLA,
SEN COMER CARNE OU CALDO,
MOITAS VECES ESTOU CHEA.

Paco Martín.Que cousa é cousa...? ED.Galaxia

O RATO E MAILA LÚA

2008-11-10T00:25:00.004+01:00

UN RATO DÍXOLLE Á LÚA:
-NUNCA REPARAS EN MIN;
POR ESO VIVO NA RÚA
METIDO NUN CALCETÍN.

ELA FITOUNO ABRAIADA.
DÉRONLLE GANAS DE RIR.
DAQUELA APAGOU A LÁMPADA
E DISPÚXOSE A DURMIR.

POLO DESPREZO DA LÚA,
O RATIÑO ALPORIZADO,
BERROULLLE CON MOITA FORZA:
- XA NON ESTOU NAMORADO!

Antonio García Teijeiro."O libro dos cen poemas".Seleccción de Marisa Núñez e Álvarez Cáccamo.

A LUA PERDEU O SONO

2008-11-09T23:57:00.003+01:00

A LÚA PERDEU O SONO.
NON O ATOPA POR NINGURES.
MAL SABE A LÚA LUADA
QUE A LÚA CON SONO,
NON É NADA.
NON É NADA.

Gloria Sánchez."Fafarraios"Ed.Xerais

O INVERNO ESTÁ PRETO

2008-10-19T21:20:00.004+02:00

A lúa está dormida.
A noite está a chamala.
A lúa está roncando.
A noite está enfadada.

Cobren sabas de prata
o seu leito salgado.
Hoxe xa non esperta;
segue cos ollos pechados.

Dorme a lúa no mar.
Sombras voan no ceo.
Pensa a noite,tristeira:
"O inverno xa está preto".

Antonio García Teijeiro."Lueiro de papel"
Pintura:"Outono".Maruxa Olavide

IDA DE OUTONO

2008-10-08T23:01:00.006+02:00

POR UN CAMIÑO DE OURO VAN OS MERLOS… ONDE?
POR UN CAMIÑO DE OURO VAN AS ROSAS… ONDE?
POR UN CAMIÑO DE OURO VOU…
ONDE, OUTONO? ONDE PAXAROS E FLORES?

Juan Ramón Jiménez

TAN TAN,QUEN É?

2008-10-08T22:29:00.005+02:00

TAN ,TAN. QUEN É...?

TAN, TAN. QUEN É?
O OUTONO OUTRA VEZ.
QUE QUERE O OUTONO?
O FRESCO DA TÚA SEN.
NON CHO QUERO DAR.
EU QUÉROCHO QUITAR.

TAN ,TAN. QUEN É?
O OUTONO OUTRA VEZ.

Canción.García Lorca.

LERIA.A ORELLA

2008-02-25T21:07:00.002+01:00

ORELLA PENDELLA

VAI Á LEÑA,

SE NON VÉS DE HORA

DURMIRÁS FORA

COS CANCIÑOS

DA TÚA DONA.

M.BARRIO.E.HARGUINDEY.”Lerias e enredos para os más pequenos”.Galaxia

COXEGUIÑAS

2008-02-25T20:54:00.004+01:00

TANTARANTÁN TARANTÁN TARANTIÑA

O QUE NON COME NON TEN BARRIGUIÑA

TANTARANTÁN TARANTÁN TARANTOLA

O QUE NON COME NON TEN BARRIGOLA

MANUEL RICO VEREA.”Vente vindo,ven cantando.Cancioneiro escolar galego”.Fontel

PICASSO."Madre y niños jugando"

ADIVIÑA

2008-02-25T19:48:00.003+01:00

ALTOS PAZOS
LINDAS VENTÁS
ABREN E PECHAN
E NINGUÉN ANDA ATRÁS.

PACO MARTÍN."QUE COUSA É COUSA.."GALAXIA

OS SALOUCOS

2008-02-25T19:35:00.001+01:00

SALOUCO TROUCO

SALE DE MIN

E VAI PARA OUTRO.

POPULAR

XOGO.A MAN

2008-02-25T19:19:00.002+01:00

Man morta ,man morta,

Vai petar á túa porta.

Batíase a man do neno ou nena,e na derradeira frase,tentébase tocarlle a cara.

O xogador impedíao poñendo a man ríxida.Para o tono e a atención.

Popular.Recollido en Cuntis

"Man".MENCHU LAMAS

Canto para durmir

2008-02-25T19:12:00.003+01:00

E, neniño, e, que aí ven o cocón
para buscar o neno que non dorme, non.
E, neniño, e, que che hei dar o té
e mailas papiñas nun cacharolé.
E, neniño, e, zapato no pé
sardiña salgada para noso Xosé

Manuel Rico Verea.”Vente vindo,ven cantando.Cancioneiro escolar galego”

O NENO E O XABARÍN

2008-01-23T18:35:00.000+01:00

-XABARÍN, XABARÍN

QUE FAS NO MEU XARDÍN?

- BUSCO UN BRINQUEDO

NESTE LINDO ARBOREDO.

-BRINQUEMOS NO ARREDOR

A XABARÍN E CAZADOR.

-EU NON GOSTO DA GUERA

SÓ QUERO PAZ NESTA TERRA.

- XABARÍN, XABARÍN

TOCARÁS NO MEU VIOLÍN?

-NESTE LUGAR DE SOIDADE

FAREMOS A NOSA AMISTADE .

XOSÉ LOIS GARCÍA.”A figueira lingoreteira”.Edicións do Castro.

NON QUERO SER PRÍNCIPE

2008-01-16T22:52:00.000+01:00

NON QUERO SER PRÍNCIPE

QUE QUERO SER RA,

PATIÑAS LIXEIRAS

E LAMA NA MAN.

NON QUERO SER PRÍNCIPE

DE BRANCO CABALO,

NIN VER Á PRINCESA,

NIN TER UN CRIADO.

NON QUERO SER PRÍNCIPE

QUE ANDE ÁS BATALLAS,

QUE DURMA NA CÁRCERE

DAS ALTAS MURALLAS.

EU QUERO O SILENCIO

DA LAGOA ESCURA,

CROAR CADA NOITE,

SOÑAR COA ESPESURA.

EU QUERO A LENTURA

DA ERBA ESQUECIDA,

O ULIDO DAS FLORES

NUNHA AMAÑECIDA.

NON QUERO SER PRÍNCIPE

DE SEDA TAPADO,

NIN LEVAR ESPADA

NIN USAR CALZADO.

¡DEIXÁDEME LIBRE

QUE QUERO SER RA,

QUE AS AUGAS ME FALEN

DO QUE HAI MÁIS ALÁ!

ANA Mª FERNÁNDEZ.”A casa de había unha vez”.Xerais

FAFARRACATRO

2008-01-13T19:17:00.000+01:00

ERA DUN REI
QUE TIÑA UN PALACIO
CON TRES COROIÑAS
CON TRES PRINCESIÑAS.

COROA BOROA
DOÍALLE A MOA
Á DOCE PRINCESA
DE CARA DE ROSA.

CARA DE MELÓN
MELÓN MELONCIÑO:
-A QUEN SANE A FILLA
DOULLE O MEU REINO.

MILÓN MILITÓN
SANDÍA MOI FRÍA
DEULLE UN CURANDEIRO
PARA A PRINCESIÑA.

A MOA SANOU,
E O CURANDEIRO EN PAGO LEVOU:
UNHA CACHIMORA,
UNHA LAVADORA,
UN DENTE DE OVELLA
E UN TIRÓN DE ORELLAS.

GLORIA SÁNCHEZ."Fafarraios".ED.Xerais

A TROMPETA

2008-01-13T18:46:00.000+01:00

A TROMPETA
EA
EA
¡QUE BEN SOA!
TROMPETEA.
SOA SECA,
SOA LEDA
EA
EA
TROMPETEA.
¡QUE TROMPETA
TAN SINCERA
TAN HUMILDE
TAN SINXELA!
VOZ DOURADA
VOZ MARELA
VOZ QUE SEMPRE
TROMPETEA.

ANTONIO GARCÍA TEIJEIRO."Aire sonoro".Ir Indo

NACHO FALGUERAS."Bodegón con trompeta"

A NEVE E O SOL

2008-01-13T18:40:00.000+01:00

A NEVE E O SOL CASARON
EN MAÑANCIÑA DE ABRIL,
ELA VESTIDA DE BRANCO
CON PERFUME DE XASMÍN
EL CO SEU METAL BRILLANTE
DE TROMPETA E DE CLARÍN.

FOI NA PRAIA DOS LAGARTOS
ONDE SE DIXERON O SI.

E BAIXARON POLAS LAXAS
AQUEL DÍA TAN FELIZ
AUGAS CANTAREIRAS,LIMPAS
COMO UN SÓ DE VIOLÍN.

HELENA VILLAR JANEIRO."Na praia dos lagartos".Edicións do Castro

LERIA DE ANINOVO

2007-12-17T20:50:00.000+01:00

ANINOVO CON BEN VEÑAS,

COS AÑOS E COAS OVELLAS

E CO SOL ENRIBA DAS TELLAS.

“Xogos infantís”.Montaña encantada.Everest

"Galicia".Arturo Souto Feijoo

CANTO DE REIS

2007-12-16T18:35:00.000+01:00

Día de Reis, día de Reis,
primeira festa do ano,
entre damas e doncelas,
imos pedir o aguinaldo.

Si nos queren dar o aguinaldo,
non nos fagan agardar,
somos de lonxanas terras,
e temos moito que andar.

Aquí ven a vella,
co aguinaldo,
parecelle moito,
e vaille quitando.

Cántolle os Reis,
guedellos de cabra,
cántolle os Reis,
e non nos dá nada.

Estas portas son de ferro,
aquí vive un caballero.
Estas portas son de estopa,
Aquí vive un lapasopas.

Recollido polo C. O Bolo en Nadal@galiciadixital.com

CANTO DE NADAL

2007-12-16T18:29:00.000+01:00

Os tres camelos dos reis
ó chegaren a Galicia,
como non viron deserto,
morrían os tres de risa.
E, ó veren tanta auga
nos regatos e nas rías,
_¡Que catarro imos coller
como veña unha chovisca!
Melchor taca unha gaita,
Baltasar un tamboril,
o Gaspar, que non é músico,
alumea cun candil.

(Recollido no Couto de Outeiro, Mondoñedo, por Carlos Gómez) en Nadal@galiciadixital.com

"Navidade".Juanito Laguna.

DEIXÁDEME LIBRE

2007-12-11T22:49:00.000+01:00

DEIXÁDEME LIBRE,

QUE QUERO IR Ó MAR;

CAMIÑO DE IDA,

NON VOU REGRESAR.

AS ONDAS ME LEVEN

ONDE HAXA UN CANTAR.

DO BARCO DOS SOÑOS,

SEREI CAPITÁN.

ARROACES MOUROS

VIRANME ESCOLTAR.

SEGUIREI DA ESCUMA

O LOUCO BAILAR.

DOS PORTOS QUE TOQUE,

NINGÚN SABERÁ.

DEIXÁDEME LIBRE,

QUE QUERO IR Ó MAR.

ANA Mº FERNÁNDEZ.”Ondas de verde e azul”.Xerais

POLO LARANXAL

2007-12-11T22:23:00.000+01:00

POLO LARANXAL

TRES AVELAIÑAS ANDAN A VOAR.

UNHA ,DÚAS,TRES,

DE PRESA QUE VOAN,VENSE E NON SE VEN.

POLO LARANXAL

TRES AVELAIÑAS ANDAN A CHUCHAR.

UNHA ,DÚAS,TRES,

DE TANTO QUE CHUCHAN,BORRACHAS DE MEL.

¡CAÍDAS NO CHAN,

TRES AVELAIÑAS POLO LARANXAL!

XOSÉ MARÍA ALVAREZ BLÁZQUEZ.”Roseira do teu mencer”.Xerais

"Sin título".Berta Cáccamo.

OS LAGARTOS

2007-12-11T22:11:00.000+01:00

OS LAGARTOS VAN MARCHAR

E CHORAN DESCONSOLADOS;

SEN CANCIÓN VERDE XA QUEDAN

AS PEDRIÑAS DOS VALADOS.

¡AI, LAGARTOS,MEUS AMIGOS,

VERDE CANTAR DAS PAREDES,

NO LOMBO E MESMO NOS OLLOS,

COR DE CAMPO E LAMA TEDES.

LAGARTIÑOS, NON MARCHEDES;

MIRADE QUE AHÍ VEN O SOL,

CO SEU FEIXIÑO DE RAIOS

FARAVOS UN COBERTOR.

ANA Mª FERNÁNDEZ.”Ondas de verde e azul”.Xerais

"Man e serpe".Menchu Lamas

A LÚA

2007-12-06T20:50:00.002+01:00

LÚA QUE SAES DE NOITE NÚA
¿ONDE TES A CASA TÚA?

LÚA NOVA
OCULTA NA COVA.

LÚA CRECENTE
MÉDRALLE UN DENTE.

LÚA MINGUANTE
CAIRO DE ELEFANTE.

LÚA QUE SAES DE NOITE ESPIDA
¿ONDE DORMES DE DÍA?

XOÁN NEIRA."Xiz de cor".Baía edicións

"Lúa".Oscar Villán

TRABALINGUAS

2007-12-06T19:58:00.000+01:00

SE VOU A BUEU
NUN BOU,VOU.
SE NON VOU
NUN BOU,
NON VOU.

MONTSE GINESTA."Trabalinguas para xogar".Ala Delta.Edelvives

ADIVIÑA

2007-12-06T19:47:00.000+01:00

MOITAS ESTRELIÑAS
CAÍDAS DO ALTO
E A MIÑA CASIÑA
VESTIDA DE BRANCO.

PACO MARTÍN."¿Que cousa é cousa...?Galaxia

NEVANDO

2007-12-06T19:20:00.000+01:00

FOLERPAS DE NEVE
TODAS REBULDEIRAS
CAEN PASENIÑO
NA HORTA,NA EIRA.

FOLERPAS DE NEVE
MOVIDAS DO VENTO
PECHADO NA CAS
NON TEÑO CONTENTO.

O DÍA ESTÁ TRISTE
NON PODO XOGAR
COS MEUS COMPAÑEIEROS
DO VERDE LUGAR.

CÚBRENSE AS HERBIÑAS
DE BRANCA FARIÑA.

SEBASTIÁN PAZ SUÁREZ."Versos para ler na escola".Ed.toxosoutosAlfred Sisley."Nevando"

CHOVENDO A MARES

2007-11-22T16:38:00.000+01:00

CANDO CHOVE

NAS MEIXELAS

CORREN PINGAS

POLA TERRA.

CANDO CHOVE

NOS OUTEIROS

BAIXAN RÍOS

ALGAREIROS.

CANDO CHOVE

NOS PENEDOS

APARECEN

CERTOS MEDOS.

CANDO CHOVE

NOS SOLPORES

NACEN MORNOS

OS AMORES.

CANDO CHOVE

NO CANTIL

DORME MAIO

CON ABRIL.

CANDO

CHOVE

AS GAIVOTAS

NON SE MOVEN.

CANDO

CHOVE

ATA OS PEIXES

DIN QUE CHOVE.

ANTONIO GARCÍA TEIJEIRO."Chove nos versos".Xerais

VEN ONDA NÓS O OUTONO

2007-11-19T00:07:00.000+01:00

VEN ONDA NÓS O OUTONO
DACABALO DO AIRE;
NOS CAMIÑOS DA FRAGA
OS OURIZOS XA ABREN.
SÍNTOO CHEGAR CONTENTO
DA ETERNA VIAXE
ENREDANDO ENTRE AS FOLLAS,
ESTREANDO FRIAXE.

ANA Mª FERNÁNDEZ.”Ondas de verde e azul”.Xerais

ARCO DA VELLA

2007-11-18T23:49:00.000+01:00

ARCO DA VELLA
VAITE DE AÍ

QUE AS NENAS BONITAS
NO SON PARA TI.

FUXE CHUVIA,FUXE SOL,
FUXE RODA DE COLOR
QUE A NENIÑA QUERE BRINCAR
COAS AREAS DO AREAL.

VAITE NÉBOA,VAITE VENTO,
VAITE CARA DE MAL TEMPO
QUE A NENIÑA QUERE
CORRER POLA AREAS DO LER.

¡AI, MIÑA NENIÑA,NENA,
NON SE VAI O ARCO DA VELLA!

XOSÉ MARÍA ALVAREZ BLÁZQUEZ.”Roseira do teu mencer”.Xerais

NÉBOAS

2007-11-18T23:43:00.000+01:00

PORTOMARÍN
TEN UN ARCO REDONDIÑO
PARAQUE XOGUE Ó PASEMISÍ
A NÉBOA DO MIÑO.
O RÍO,Ó SENTILA PASOMISAR,
ENTOA BAIXIÑO O MESMO CANTAR.

XOÁN BABARRO."Ten,ten,a,miña casa ten..." .Árbore.Galaxia

PARAUGAS

2007-11-18T23:22:00.000+01:00

POLOS ALTOS
DO POUSADOIRO
ANDA UNHA NENA
CUN ZOSCADOIRO
PARA ZOSCARLLE
Ó VENTO NORDÉS,
PORQUE LLE PUXO
O PARAUGAS DO REVÉS
E MOLLOUNA TODIÑA
DA CABEZA ÓS PES.

XOÁN BABARRO"Ten,ten a miña casa ten..."Arbore.Galaxia

CARACOL

2007-11-15T23:04:00.001+01:00

CARACOL, COL, COL;
CARACOL, CARACOLEIRO;
¡PON ÓS TEUS CORNOS Ó SOL
XA QUE ERES TAN FRIOLEIRO!

O LOMBO LÉVA-LA CASA,
CARACOL, CARACOLEIRO;
¡E DEIXAS CINTAS DE SEDA
ENGALANANDO O CARREIRO!

CARACOL, COL, COL;
CARACOL, CARACOLÓN:
¡PON OS TEUS CORNOS Ó SOL
Ó SOL OS TEUS CORNOS PON!

Manuel María."Os soños na gaiola".Merlín. Xerais

AS UVAS

2007-11-11T18:59:00.002+01:00

OS ANANOS DO OUTONO
PINTAN AS UVAS.

OS RASPACES ASEXAN
AS MAIS MADURAS.

TAMÉN OS GORRIÓNS
REVOAN ENTRE AS CEPAS
DE DOUS EN DOUS.

PURA VÁZQUEZ."O libro dos cen poemas".Espiral maior.

ADIVIÑA

2007-11-11T18:50:00.000+01:00

PUCHEIRIÑO PEQUENIÑO

GARDA RICO MANXARIÑO,

NIN COCIDO,NIN GUISADO,

NIN NO LAR AFERVENTADO

E COMELO HAS DE SABER

SEN GARFO E SEN CULLER.

PACO MARTÍN.¿Que cousaé cousa....?.Galaxia

ADIVIÑA

2007-11-11T18:29:00.000+01:00

SON REDONDA COMA O MUNDO

PARA MORRER TODA ME ESGAZAN,

DÉIXANME SÓ O PELEXO

E TODO O ZUME ME SACAN.

PACO MARTÍN.¿Que cousa é cousa..?.Galaxia

ADIVIÑA

2007-11-11T18:21:00.001+01:00

ALTA ESTOU

LADRÓN VEXO VIR

DO MEU CARAPUCHO

NON PODO FUXIR.

TRADICIONAL

LEVÁNTATE ,NEBRA...

2007-11-11T17:59:00.000+01:00

¡LEVÁNTATE ,NEBRA,

DO BICO DA SERRA!

AÍ VEN SAN MARTIÑO

NO SEU CABALIÑO,

QUE TE VAI LEVAR,

QUE TE VAI POUSAR

NA TONA DO MAR!

ANTONIO NORIEGA VARELA.

DONA CHUVIA

2007-11-10T18:20:00.000+01:00

¿Queres ver coser?
Escoita chover.

Crávanse as agullas

enfiadas de auga

no pano da terrra,

que é saba mollada.

Baixa dona Chuvia,

cabaleira branca

mendar prados verdes

con fíos de prata.

¿Queres ver coser?

Escoita chover.

HELENA VILLAR E XESÚS RÁBADE."Don e Dona".Árbore-Galaxia.

O PASPALLÁS E O SOL

2007-11-10T18:03:00.001+01:00

DÍXOME O PASPALLÁS

CANDO PASEI O RÍO

QUE NON SAÍA O SOL

POR MOR DE QUE VAI FRÍO.

EU MANDEILLE UN ABRIGO

DE CUNCHIÑAS DO MAR

PARA QUE SE ACOCHASE

E SAÍSE A PASEAR.

E O SOL SAIU TAN FORTE

QUE O PASPALLÁS VOOU

E ENTRE MOITAS FOLLIÑAS

CO MEDO SE AGOCHOU.

ANISIA MIRANDA."Cantarolas".Xerais

DON OUTONO RI

2007-11-10T17:01:00.001+01:00

Don carballo chora landras

na amencida.

E don Outono baballa

néboa fría.

Don Labrego, de sombreiro,

aplaude a don Castiñeiro

con variña de abelaira.

E don Ourizo da chaira,

como non se ten coa risa,

cáenlle dentes de castaña.

HELENA VILLAR E XE´SUS RÁBADE."Dona e Don" Árbore-Galaxia

ADIVIÑA

2007-11-06T23:06:00.000+01:00

ADIVIÑA

Para que eu baile póñenme a capa

porque sen capa non podo bailar

e para que eu baile tíranme a capa

porque con capa non podo bailar.

TRADICIONAL

O ESQUÍO

2007-11-06T20:27:00.000+01:00

VIVE NUN CARBALLO

VAI DE PÓLA EN PÓLA,

RECOLLE BUGALLOS,

XOGA Á MARIOLA.

VISITA A UN VECIÑO,

QUE HAI NUN CASTIÑEIRO

PORQUE VAI VELLIÑO

E ANDA ALGO TRISTEIRO.

A NOIVA DO ESQUÍO

VIVE NUHA ABRAIRA,

DALLE ELA ABELÁS

E EL LÉVALLE LANDRAS.

MARICA CAMPO.Abracadabras.Ed.Do Castro.

CONTO DE NUNCA ACABAR

2007-11-06T20:14:00.000+01:00

HABÍA UNHA VEZ UN CATIVO

NUN CASTIÑEIRO SUBIDO

DEBULLANDO UNHA CASTAÑA,

E DE CONTARCHE ESTE LÍO

XA SE ME FORON AS GANAS.

ANTÓN CORTIZAS."Contos de vento e de nunca acabar.Árbore.

OUTONO

2007-11-06T19:13:00.000+01:00

Outono
ten sono
Non pode durmir

Ponlle unha mantiña

que se queda axiña

sereno
e
feliz.

ANTONIO GARCÍA TEIJEIRO."As catro estacións".Árbore.

PARAUGAS

2007-11-04T20:59:00.000+01:00

UNHA MAÑÁ,PITIÑO PISPÍN

SAÍU PASEAR.

DÍXOLLE A NUBE:

"PIN-PIRIN-PÍN,PITIÑO PISPÍN

COAS MIÑAS PINGAS HEITE MOLLAR".

DÍXOLLE O PITO:

"TEÑO PARAUGAS,

PARA AS TÚAS PINGAS:

¡PAN-PARAN -PÁN!"

GLORIA SÁNCHEZ."Rimas con letra".Xerais

XOGO

2007-11-04T20:15:00.000+01:00

- ¿Como te chamas?

- Comecastañas.

- ¿E de apelido ?

- Caldo cocido.

E. HARGUINDEY e outros."Lerias e enredos para os máis pequenos".Galaxia
"Noticias dos homes".Seoane.Óleo

2007-11-04T19:53:00.000+01:00

ADIVIÑA

Ave teño de nome

de lá o revestimento

o que non adiviña

non ten discorremento.

TRADICIONAL

2007-11-04T19:32:00.001+01:00

OUTONO

Chegou o tempo de Outono
Prás castañas varear
¡Chegou o tempo do sono
e a razón de sementar!

MANUEL MARÍA." Os soños na gaiola".Xerais

MENTIRAS

2007-11-02T00:30:00.000+01:00

ERA UNHA FIGUEIRA

FEITICEIRA

QUE CEN FILLOS TIÑA

E TODOS CON LEITE MANTIÑA.

VEU UN FORTE FURACÁN

E GUINDOU CEN E CEN NO CHAN.

SUBIRON TODOS A UN CUNCHIÑO DE NOZ

E CHEGARON NADANDO A FOZ.

XOAN BABARRO."TEN,TEN A MIÑA CASA TEN..."Ärbore

HABÍA UN VENTIÑO

2007-11-01T23:48:00.000+01:00

Había un ventiño

que non tiña ollos.
Había outro vento
con cara de tolo.

Había un ventiño

vestido de azul.

Había outro vento
que viña do sur.

Había un ventiño

con gafas de prata.

había outro vento

con gafas de nácara.

Os ventos que había

están a durmir.

Calade,meniños

a noite é feliz.
Antonio García Teijeiro."Ventos".Xerais

ADIVIÑA

2007-11-01T23:07:00.000+01:00

Pucheiriño está no campo

co seu sombreiriño branco;

nin é palla,nin oliva,

nin atinas ata que cho diga.

Paco Martín,"Que cousa é cousa...?

TRABALINGUAS

2007-11-01T22:42:00.000+01:00

GANCHO REVIRAGANCHO,

QUE TANTO REVIRAGANCHEACHES

DEIXA QUE TE DESREVIRAGANCHEE

CON ESTE DESREVIRAGANCHIÑO QUE TEÑO

PARA DESREVIRAGANCHEAR

GANCHOS REVIRAGANCHEADOS

NAS RAMAS DO CARBALLAL.

XULIO COBAS."TRABALINGUAS PARA XOGAR"

2007-11-01T22:21:00.000+01:00

OUTONO DOURADO

VEN VINDO , OUTONO DOURADO,
COA TÚA FRAUTIÑA DE VENTO
E O TEU PANTALÓN MOLLADO.

BRINCA NO MEDIO DOS MONTES
CO ARRECENDO NO PELO
DAS ESPIGAS E DAS FONTES.

CÓLLELLE A DIANTEIRA Ó FRÍO
ACASTAÑANDO NAS CORES
DA BEIRA DO NOSO RÍO.

VEN VINDO OUTONO DOURADO,

COS PETOS CHEOS DE NOCES
E DE OURIZOS REGAÑADOS.

ANA Mª FERNÁNDEZ. "POLA RÚA DOS VERSOS"

ADIVIÑA

2007-10-29T23:13:00.000+01:00

REDONDIÑA, MORENIÑA,

UN POUCO APLANADIÑA

PÓDESE COMER CRÚA,

ASADA OU COCIDIÑA

SAN MARTIÑO

2007-10-29T22:58:00.000+01:00

POLO SAN MARTIÑO

TROMPOS Ó CAMIÑO

POLO SAN AMARO

TROMPOS Ó FAIADO.

A CASTAÑA

2007-10-29T22:32:00.000+01:00

A CASTAÑA NO OURIZO

EU BEN SEI O QUE FAI:

CANDO ESTÁ VERDE ,

MADURA.

CANDO ESTÁ MADURA,

CAE.

O CUCO

2007-10-29T20:53:00.000+01:00

CANTA O CUCO CALA E CANTA

NOS CASTIÑEIROS DO VAL.

PASA O TEMPO E NON DI NADA,

E VOLTA O CUCO A CANTAR.

UXIO NOVONEYRA

CATRO AVES

2007-10-29T20:35:00.000+01:00

CATRO AVES ESCOLLIDAS

SON AS QUE PASAN O MAR:

O CUCO E A ANDORIÑA

A RULA E O PASAPALLÁS.

(TRADICIONAL)

A BELA DURMINTE

2007-10-11T21:27:00.000+02:00

¡PROBE PRINCESIÑA

CEN ANOS DURMIDA!...

CASTIGOUNA A FADA

QUE FORA ESQUENCIDA.

AO CRAVARSE O FUSO,

QUEDÓUSE DURMIDA...

AS AVES CANTABAN,

PERO ELA DURMÍA...

DURMÍA O CASTELO.

¡DURMÍA...,DURMÍA!

¡QUE BELA PRINCESA,

CEN ANOS DURMIDA!

CHEGARÍA O PRÍNCIPE

E A DESPERTARÍA...

¡E TODO O CASTELO

VOLTARÍA A VIDA!

"CAMPO E MAR ABERTO" Dora Vázquez
Edicións Celta

O SOL

2007-10-11T21:06:00.001+02:00

O SOL CHÁMASE LOURENZO

I É UN SEÑOR MOI FINCHADO

QUE ESTÁ NO OUTO DO CEO,

TODO O DÍA RELUMBRANDO.

VAI VESTIDO DE MARELO

LEVA CHALEQUE ENCARNADO.

MOI SEGURO DE SÍ MESMO,

O SEU CALOR NOS VAI DANDO.

O SOL CHÁMASE LOURENZO

I É UN SEÑOR MOI SEÑADADO.

¡SI NON FORA POLO SOL,

ESTARÍA O MUNDO XEADO!

SOIO O SOL MANDA NO CEO,

MOI SOLEMNE, MOI BARBADO.

¡AS SÚAS BARBAS SON OS RAIOS,

CON QUE NOS VAI ALUMANDO!

"OS SOÑOS NA GAIOLA". Manuel María

Edicións Celta