A escola

A pombiña branca
quería ir á escola.
Mercou catro libros
un lapis e goma.
Gloria Sánchez

A cidade onde vivo

A cidade onde vivo ten mar.
No inverno é mar bravío;
no verán, agarimoso;
cando quere mimoso e cando non,
maldito,
perigoso,
traidor,
e, se non,
que llo digan ó pescador
que nel anda, coma unha espiña
para traer a porto
pescada e xurelo e sardiña.

Fran Alonso. "Cidades". Xerais
Imaxe:"Berbés". Lugrís

Un home de Lugo criaba perdices

Un home de Lugo criaba perdices
pra que os namorados se amasen felices.

Criaba perdices con trigo e arroz
pra que os namorados se enchesen de amor.

Con trigo e arroz e verzas ben grandes
pra que os namorados de amor se fartasen.

Con verzas ben grandes e pedras de azucre
pra que os namorados se amasen nas nubes.

Con pedras de azucre e gromos de lirios
pra que os namorados sentisen delirios.

Con gromos de lirios criaba perdices
pra que os namorados de amor se fundisen.

E tantas perdices criou o bon home
que para si mesmo non buscou amores,

e cría que cría, perdendo a memoria
nun pau dun poleiro quedouse sen noiva.

Antón Cortizas."Era unha vez na quimbamba". Tambre

Carnaval

Carnaval na praza:
danzas,
carracas
....
(Carla a vaca,
Sandra a marrá) ...
Carnaval na praza:
capas,
máscaras .
.....
(Alba a dama,
Lara a rá)
...
Carnaval na praza:
samba,
palmas
...
(Sara a gata,
Marta, paspallás)
...
Carnaval na praza:
a mala cara
gardada na casa. Elvira Rivero Tobío. "Palabras brancas". Ed. Xerais 2008
Imaxe: Fino Lorenzo. "Palabras Brancas". Ed. Xerais 2008

Bagdag

A paz abafa calada
nas casas
da gran Bagdag.

Bagdag agarda
mañás calmas
bañadas en paz.
A paz calza alpargatas,
balas calza
a arma fatal.

Bagdag arrastra
palabras mancadas
tras as armas vas.

A paz,
palabra tan cara,
a paz, palabra cabal.

Bagdag agarda
a paz da nácara,
prata, ámbar, ananás
..

A PAZ
Elvira Rivero Tobío."Palabras Brancas". Ed. Xerais 2008.
Ilustración Fino Lorenzo

Basta

Basta á paz maltratada,
ás trampas canallas,
ás malvadas lacras: basta!

Basta á fatal labazada,
ás casas arrasadas,
ás falsas fazañas:
basta!

Basta ás mans asañadas,
ás fadas malfadadas,
as malas malandanzas:
basta!

Basta ás amargas palabras .
Grazas ás palabras plantadas
nas landas da paz.

Elvira Riveiro Tobío. "Palabras Brancas". Ed. Xerais 2008
Imaxe: Fino Lorenzo


Basta

Un soldado detrás dun fusil

UN SOLDADO DETRASDUN FUSIL

Unsoldado detrasdunfusil detrasdunhabala detrasdoutrabala detrasdoutrabala detrasdou
…..é
unha enorme
parvada.

Gloria Sánchez.