O SAMAÍN
Era noite de trebón
nun vello e mouro castelo,
a auga caía a chuzos
e os lóstregos a centos.
Bule, bule, bule, bule,
bailan, bailan os espectros,
bailan, bailan esqueletos,
sapos, monstros e morcegos.
Bailan, bailan as pantasmas,
monstros, bruxas e curuxas.
Bule, bule que aínda é cedo
e hoxe toca pasar medo.
Grupo Mamá Cabra
Adiviñas recollidas do libro de Antón Cortizas titulado "Adiviña esta adiviña", Ed. Galaxia
A unha vella moi engurradiña
tapáronlle o cu cunha tranquiña.
Adiviña se tes tempo,
cal é a herba que ven os cegos?
Ben cocida,
ben
asada,
ben
no pote
fermentada.
Brúa no alto dos outeiros
e abanea os castiñeiros.
Cen e cen fillos ten
e a todos con leite os mantén.
Moitas damas nun curral,
todas cantan un cantar,
todas bailan por igual.
Longa longarela,
ten uns dentes
coma unha serra.
Cal é a ave que ten la
coma se fose unha ovella,
mais nin bea nin peteira,
nin cousa que se pareza.
Toda a miña pasa
entre o verde e o marrón,
e cando chega o outono
son unha festa de cor.
Había unha vez…
un susto,
un arrepío,
un medo.
Había unha vez…
un lobo,
unha pantasma,
un felo.
Había unha vez…
unha noite,
un monstro,
¡un pesadelo!
Ana Mª Fernández: Tres voltas ó planeta
Era unha vez unha pantasma
pequena, mirrada e feúcha
que por riba tiña asma.
Asustar
nenos quería
para gañar confianza,
fose noite ou fose día.
Esperaba o momento xusto
agochándose no armario
e …zas!, así daba o susto.
Pero non había xeito.
Por unha cousa ou por outra
fracasaba no seu intento.
Ai, pantasma, pantasmuna!
Todo o mundo se ría
da súa escasa fortuna.
Non era que non o intentaba
_ que ela o facía a conciencia_,
só que nunca o lograba.
Rafa Villar: Acuarelas, Ed. Galaxia
