A buxaina
Baila arredor
da punta do pé,
faino ao dereito
e tamén ao revés.
É de madeira,
está feita de buxo,
xira moi axiña
coma un aturuxo.
Baila ao son da música,
na cabeza un sombreiro
e remata nun botón
coa punta de aceiro.
Este xogo tan fermoso,
da buxaina lixeira,
é un baile rápido,
coma o da muiñeira.
Dá un pequeno brinco,
cando a solta do lazo,
queda virando no chan,
ou baila no meu regazo.
Cando está cansa,
de xirar e xirar,
cae cara a un lado,
e ponse a descansar.
Mª Canosa, Vagalume de versos, Galaxia
